پیدایش ۵۰
۵۰
۱ یوسف گریه‌کونان خورَه تأودَه خو پئرٚ رو و اونَ ماچی بده. ۲ بَزین خو طبیبأنَ کی اونَ خدمت کودیدی فرمان بده کی اونٚ پئر ایسرائیلَ ببرید مومیایی بوکونید. پس اوشأن او کارَ بوکودیدی. ۳ مومیایی کودن چهل روز کار دأشتی. وختی اَ مدت تومامَ بوسته، مصرٚ مردوم هفتاد روزٚ تومام عزاداری بوکودیدی. ۴ عزاداری کی تومامَ بوسته، یوسف فرعونٚ درباریأنَ بوگفته: «ایتأ محبت مرَ بوکونید، فرعونَ بیگید: ۵ ‹می پئر مرَ قسم بده بوگفته: «من مردن درم. مرَ او قبرٚ دورون کی سرزیمینٚ کنعانٚ میأن می وسی بکنده‌بوم دفن بوکون.» هسه ایجازه بدن بشم می پئرَ دفن بوکونم و وأگردم.›»
۶ فرعون بوگفته: «بوشو تی پئرَ هوطو کی قسم بوخوردی، دفن بوکون.» ۷ پس یوسف بوشو کی خو پئرَ دفن بوکونه و فرعونٚ تومامٚ خادمأن، هم درباریأن، هم تومامٚ مصرٚ وزیرأن اونٚ دونبالسر رأ دکفتیدی، ۸ تومامٚ یوسفٚ خانواده، اونٚ برأرأن و تومامٚ اونٚ پئرٚ فامیلأنم اوشأنٚ اَمرأ. فقط اوشأنٚ زأکأن و اوشأنٚ گله‌یأن و رمه‌یأن جوشنٚ دورون بِیسَه‌ییدی. ۹ سوارأن، خوشأنٚ اسبأن و ارابه‌یأنٚ اَمرأ ایتأ پیله کاروان بوبوسته کی یوسفٚ اَمرأ راهی‌یٚ کنعان بوبوستیدی.
۱۰ وختی کی فأرسه‌ییدی خرمنگایٚ اَطاد کی اردنٚ روخانٚ نزدیکی نهَه‌بو، خیلی شیون و زاری بوکودید و یوسف هفت روزٚ تومام خو پئرٚ وسی ماتم بیگیفته. ۱۱ وختی کنعانیأنی کی اویه زندگی کودیدی، اَطادٚ خرمنگاهٚ دورون عزاداری‌یَ بیده‌ییدی بوگفتیدی: «اَن مصریأنٚ میأن ایتأ پیله ماتمه.» هَنٚ وسی او محلٚ نامَ «آبل مصرایم»#۵۰:۱۱ «آبل مصرایم» یَنی «مصریأنٚ عزاداری». نام بنَه‌ییدی. ۱۲ یعقوبٚ پسرأن هوطو کی یعقوب وصیت بوکوده‌بو، انجام بدَییدی. ۱۳ اونَ ببردیدی کنعانٚ سرزیمین و هو غارٚ دورون کی مکفیله دشتٚ میأن، نزدیکٚ مَمری نهَه، دفن بوکودیدی، هو دشت و غاری کی ایبراهیم عفرونٚ حیتّی جَا بیهه‌بو کی آرامگاه ببه.
یوسف خو برأرأنَ دیلداری دهه
۱۴ یوسف بعدٚ اَنکی خو پئرَ دفنَ کوده، خودش، اونٚ برأرأن، و تومامٚ اوشأنی کی اونٚ اَمرأ مراسمٚ تدفینٚ وسی بوشو بید، وأگردستیدی بوشوییدی مصر. ۱۵ وختی کی یوسفٚ برأرأن بیده‌ییدی کی خوشأنٚ پئر بمرده، کس‌کسَ بوگفتیدی: «اگه یوسف اَمی جَا کینه به دیل بدأره و اَمی دشمنی کودنٚ وسی انتقام فیگیره، چی وأ بوکونیم؟» ۱۶ هَنٚ وسی یوسفَ پیغام بدَییدی کی: «اَمی پئر قبلٚ مردن اَطویی وصیت بوکوده: ۱۷ ‹یوسفَ اَطو بیگید: خوأهش کونم کی تی برأرأنٚ بدی‌یأن و اوشأنٚ گونایأنَ ببخش چره کی ترَ اذیت بوکودید.› هسه خوأهش کونیمی، اَمی گونایأنٚ ببخشی، اَمأن کی تی پئرٚ خودا خدمتگوزارأن ایسیم.» وختی کی یوسف اوشأنٚ گبأنَ بیشنَوسته، گریه بوکوده. ۱۸ یوسفٚ برأرأنم بَموییدی بکفتیدی اونٚ پا جیر بوگفتیدی: «اَمأن دِ تی خدمتگوزارأنیم.»
۱۹ ولی یوسف اوشأنَ بوگفته: «نَوأ ترسئنید، مگر من خودا جا سر نیشتم؟ ۲۰ شومأن نقشه بکشه‌ییدی کی مرَ بدی بوکونید ولی خودا اَ کارَ به خیریت وأگردأنه و کاری بوکوده کی خیلی‌یأن زنده بمأنید هَطو کی ایمروز بوبوسته. ۲۱ پس نَوأ ترسئنید. من شومأن و شیمی زأکأنٚ احتیاجأنَ فراهم کونم.» اَطویی خو با محبتٚ گبأنٚ اَمرأ اوشأنَ دیلگرمَ کوده.
یوسفٚ مردن
۲۲ یوسف خو پئرٚ فامیلأنٚ اَمرأ مصرٚ دورون صد و ده سال زندگی بوکوده ۲۳ و سه نسلٚ اِفرایمَ بیده. منسی پسر، ماکیرٚ زأکأنم کی به دونیا بَموییدی، یوسفٚ زأکأن به حیساب بَموییدی.#۵۰:۲۳ زبانٚ عبری دورون «یوسفٚ زانویأنٚ سر به دونیا بَموییدی».
۲۴ یوسف خو برأرأنَ بوگفته: «من مردن درم، ولی شومأن یقین بدأرید کی خودا شمرَ یاری کونه و شمرَ جٚه اَ سرزیمین به سرزیمینی بره کی ایبراهیم و ایسحاق و یعقوبَ وعده بدَه‌بو.»
۲۵ یوسف یعقوبٚ پسرأنَ قسم بدَه و بوگفته: «یقین بدأرید کی خودا شمرَ یاری کونه و شومأن وسی می خاشأنَ شیمی اَمرأ جٚه اَیه ببرید.» ۲۶ یوسف صد و ده سال دأشتی کی بمرده. بَزین اونَ مصرٚ دورون مومیایی بوکودیدی و تابوتٚ دورون بنَه‌ییدی.
Currently Selected:
پیدایش ۵۰: گیلکی (رشتی)
Označeno
Share
Copy
Want to have your highlights saved across all your devices? Sign up or sign in
© 2010-2019 Gilak Media